Gal 4 | NdeIBE | STEP | Engikutshoyo yikuthi nxa indlalifa isesengumntwana, kayehlukananga lesigqili lanxa nje ingumnikazi welifa lonke.

Galatians 4

1 Engikutshoyo yikuthi nxa indlalifa isesengumntwana, kayehlukananga lesigqili lanxa nje ingumnikazi welifa lonke. 2 Ingaphansi kwabaphathi lababambeli kuze kufike isikhathi esabekwa nguyise.

3 Ngokunjalo lathi lapho sasingabantwana sasigqilazwe yizimiso ezidingakalayo zomhlaba. 4 Kodwa kwathi lapho isikhathi sesifike ngokupheleleyo, uNkulunkulu wathuma iNdodana yakhe, yazalwa ngowesifazana, izalwa ngaphansi komthetho, 5 ukuba ihlenge abangaphansi komthetho, ukuze sithole amalungelo apheleleyo amadodana.

6 Njengokuba lingamadodana, uNkulunkulu wathuma uMoya omemezayo esithi, “Abha Baba.” 7 Ngakho kawuseyiso sigqili, kodwa indodana; ngakho njengoba usuyindodana, uNkulunkulu usekwenze waba yindlalifa futhi.

8 Kuqala, uNkulunkulu lingakamazi, laliyizigqili zalabo abangayisibo onkulunkulu ngemvelo. 9 Kodwa khathesi uNkulunkulu selimazi, loba ngithi uNkulunkulu uselazi – pho kwenzakala njani ukuthi liyabuyela emuva kuleyana imikhuba ebuthakathaka leyize na? Liyafuna yini ukuba ligqilazwe yiyo njalo na?

10 Lina ligcina izinsuku ezithile lezinyanga, izikhathi zomnyaka kanye leminyaka!

11 Ngiyalinqinekela, ukuthi ngenye indlela sengichithe imizamo yami kini.

12 Ngiyalincenga, bazalwane, wobani njengami, ngoba mina ngaba njengani. Kalenzanga lutho olubi kimi.

13 Njengoba lisazi, ngatshumayela ivangeli kini kuqala ngenxa yomkhuhlane. 14 Lanxa umkhuhlane wami wawuyisilingo kini, kalizange lingeyise kumbe lingihleke. Kodwa langamukela kwangathi ngangiyingilosi kaNkulunkulu, angathi nganginguKhristu yena ngokwakhe.

15 Intokozo yenu yonke isiyengaphi na? Ngingafakaza ukuthi aluba lalingenzanjalo, lalingakhuphuluza amehlo enu linginike wona.

16 Khathesi sengibe yisitha senu yini ngokulitshela iqiniso na?

17 Abantu labo batshisekela ukulenza libe ngabazalwane babo, kodwa kungasikho kobuhle. Abakufunayo yikulehlukanisa lathi ukuze litshisekele bona. 18 Ukutshiseka kulungile, uma injongo inhle, lokuba kube njalo kokuphela, hatshi kuphela nxa ngilani.

19 Bantwabami abathandekayo, lina engilomhelo ngani futhi uKhristu aze abunjwe phakathi kwenu, 20 ngiyafisa kakhulu ukuba lani khathesi ngiguqule isimo sami ngoba ngikhathazekile ngani.

UHagari LoSara

21 Ngitshelani lina elifuna ukuba ngaphansi komthetho, kalikwazi yini ukuthi umthetho uthini? 22 Ngoba kulotshiwe ukuthi u-Abhrahama wayelamadodana amabili, enye ingeyesigqilikazi lenye ingeyowesifazana okhululekileyo. 23 Indodana yakhe yesigqilikazi yazalwa ngendlela ejwayelekileyo; kodwa indodana yakhe kowesifazana okhululekileyo yazalwa kulandela isithembiso.

24 Izinto lezi zingathathwa njengomzekeliso; ngoba abesifazana ababili bamele izivumelwano ezimbili. Esinye isivumelwano sivela eNtabeni iSinayi e-Arabhiya njalo sizala abantwana abazakuba yizigqili: Lo nguHagari.

25 UHagari umele iNtaba iSinayi e-Arabhiya njalo uhambelana ledolobho lakhathesi eleJerusalema, ngoba lisebugqilini kanye labantwana balo. 26 Kodwa iJerusalema ephezulu ikhululekile, njalo ingumama wethu.

27 Ngoba kulotshiwe ukuthi: “Thokoza wena mfazi oyinyumba, ongazali bantwana; kekezela ukhale kakhulu, wena ongelabuhlungu bomhelo; kulabantwana abanengi bomfazi odeliweyo kulabakhe lowo olendoda.”

28 Ngakho lina bazalwane, njengo-Isaka, lingabantwana besithembiso.

29 Ngalesosikhathi indodana eyazalwa ngendlela ejwayelekileyo yahlukuluza indodana eyazalwa ngamandla kaMoya. Kunjalo lakhathesi.

30 Kodwa umbhalo uthini na? Uthi: “Susa isigqilikazi lendodana yaso, ngoba indodana yesigqilikazi kayiyikwabelana ilifa lendodana yowesifazana okhululekileyo.” 31 Ngakho, bazalwane, thina kasisibo bantwana besigqilikazi, kodwa abowesifazana okhululekileyo.